Ադրբեջանի զինված ուժերը պետք է անհապաղ և ամբողջությամբ դուրս բերվեն Հայաստանի տարածքից. ԵԽ անդամներ

«Արմենպրես»-ի հաղորդմամբ, ԵԽ-ի մեկ տասնյակից ավելի պատգամավորներ նամակ են գրել Եվրոպական հանձնաժողովի փոխնախագահ, Եվրոպական միության արտաքին գործերի և անվտանգության քաղաքականության հարցերով Բարձր ներկայացուցիչ Ժոզեպ Բորելին՝ հիշեցնելով նոյեմբերի 16-ին Ադրբեջանի սանձազերծած ագրեսիան Հայաստանի ինքիշխան տարածքի նկատմամբ։ Նամակում մասնավորապես նշված է․ «Որպես Եվրախորհրդարանի անդամներ՝ մենք դատապարտում ենք ադրբեջանական հարձակումը և ներթափանցումը Հայաստանի Հանրապետության ինքնիշխան տարածք, ինչը խախտում է 2020 թվականի նոյեմբերի 9-ի հրադադարի մասին հայտարարությունը և լրջորեն վտանգում է փխրուն խաղաղությունը տարածաշրջանում։ Ադրբեջանի զինված ուժերը պետք է անհապաղ և ամբողջությամբ դուրս բերվեն Հայաստանի տարածքից»։