Հերոսը, ում նվիրված է երգը, Տիգրան Թադևոսի Ապրեսյանն է։ Նա ծնվել է 2001 թվականի հունվարի 15-ին Գեղարքունիքի մարզի քաղաք Ճամբարակում՝ զինվորականի ընտանիքում։ Աշխույժ, ընկերասեր, «ջիգյարով» Տիգրանը առաջնորդի բնավորություն ունի, նա ամեն հարցում կարգ ու կանոն է սիրում։ (ներկայով) Տիգրանը բանակ է զորակոչվել 2019 թվականի հուլիսի 14-ին։ Ծառայել է Հադրութում։ Վերջին անգամ զանգ է տվել 2020 թվականի հոկտեմբերի 31-ին։ Ասում են, որ նա այդ օրը անմահացել է, բայց շատ քչերն են հավատում դրան, բոլորը համբերությամբ սպասում են Տիգրանին։
Հերոսի մասին Անիի «Դու կաս» երգի պրեմիերան կայացավ նոյեմբերի 18-ին։ Երգն ունի խորհրդանշական ավարտ։
«Այսօր, երբ լույս է տեսնում Տիգրանիս նվիրված երգը, ուզում եմ մի փոքր կիսվել մտքերովս։
Տիգրանիս հետ կապը կորելուց հետո անընդհատ մի միտք է ուղեղումս, որ եթե նա կա, բայց չի գտնում կապ հաստատելու որևէ միջոց, գուցե նա չի հիշում ոչինչ, որովհետև ով նրան ճանաչել է, կարող է վստահ ասել, թե նա որքան ճարպիկ ու հնարամիտ է։
Ցավն ու նրան ինչ-որ բան հիշեցնելու ձգտումս իմ մեջ ծնեց այս երգը ու ցանկացա տարածել այն, որ եթե նա կա աշխարհի որևէ մի անկյունում, գուցե իմ ձայնը նրան հիշեցնի իմ մասին, գուցե իր անունը նրան հիշեցնի իր մասին։
Երևի կմտածեք՝ գժվել եմ, բայց ես չեմ դադարելու սպասել Տիգրանիս։
Երգի խոսքերն ու երաժշտությունը երբ գրեցի, այն առաջինը լսողներից մեկը՝ ինձ շատ մտերիմ Արփինե Վաթյանը, սկսեց համոզել, որ ամեն ինչ անեմ, որ երգը ձայնագրվի, ու չնայեմ իմ առջև եղած խնդիրներին։ Ես աղոթքով այս հոգսը հանձնեցի Աստծուն, և Աստծո օրհնությամբ, ու վստահ եմ՝ նաև Տիգրանիս առաջնորդությամբ, այս երգը ստեղծվեց անհավանական արագ ու տեսանելի հրաշքով։ Երգի գործիքավորումը, տեսահոլովակի նկարահանումը, առաջ եկած գումարային հարցերը միանգամից լուծվեցին ինձ ծանոթ ու անծանոթ, արդեն հարազատ դարձած ընկերներիս շնորհիվ։ Ես իսկապես չգիտեմ՝ ինչպես շնորհակալ լինեմ ՀԱՅերին, ովքեր կողքիս են, ովքեր կան։
Երգը չի ստեղծվել շոուբիզնես մտնելու կամ հայտնի դառնալու նպատակով։ Երգը ստեղծվել է իմ սրտի խորքի խոսքն ասելու, խոնարհումս բոլոր հերոսներին բերելու և մեկ անգամ ևս Տիգրանիս կանչ ուղարկելու համար»։
—Իր ֆեյսբուքյան էջում գրում է Անին։
Մեկնաբանություններ