Երգիչ, երգահան և գործիքավորող Վարդան Գալստյանը վերջին շրջանում հեղինակել է մի շարք երգեր, որոնք կատարում են երգարվեստի լավագույն ներկայացուցիչները։ Այս առիթով փորձեցինք մի քանի հարցեր ուղղել երգահանին:
-Ինչպե՞ս են ծնվում Ձեր երգերը։
-Երգը հոգուց բխած աղոթք է։ Իմ երաժշտությունն ունի հասցեատեր… Նաև՝ ժամանակն է թելադրում իրենը։ Այսօր մենք ծանր օրեր ենք ապրում, որը ենթադրում է հայրենիքին նվիրված, հայաստանոտ երգերի պոռթկումներ։ Այդպիսի մի աղոթք կատարեց Անդրեն` «Հայաստան» խորագրով։ Առաջիկայում կլինեն հայրենիքին նվիրված նոր երգեր։ Հայաստանը և հերոս տղերքը մեր բոլորի սրտում են…
-Վարդա՛ն, ձեր երաժշտությամբ ստեղծված «Սարերով, ձորերով» երգը, այնուհետև «Ճամփա տվեք»-ը դարձել են լավագույն հիթեր։ Ո՞րն է գաղտնիքը։
-Պետք է ասեմ, որ շատ կարևոր է, թե ո՛վ է կատարում երգը… Այս դեպքում Արկադի Դումիկյանը, իրոք, վարպետորեն է կատարում. ձայնի տեմբրը, ձայնածավալը հրաշալի են։ «Սարերով, ձորերով»-ը շատերը ներկայացրին իրենց քավր տարբերակով, նույնիսկ փոքրիկները երգեցին։ Սա նշանակում է, որ երգը հասել է հասցեատիրոջը… Չմոռանանք նաև բառերի հեղինակին` Հարութ Թիզյանին, որի գրած բառերը, ինչպես ասում են, աչքի պես պարզ են և աչքի պես բարդ։
Հանդիսատեսը սիրեց նաև «Մամա» երգը` Միհրան Ծառուկյանի կատարմամբ։
-Այո՛, երգի թեմատիկան հոգեհարազատ է յուրաքանչյուր մարդու։ Ես մայրապաշտ եմ և այս առումով շատ եմ սիրում Հովհաննես Շիրազին, որն իր ստեղծագործությամբ կերտեց մոր անձեռակերտ հուշարձանը։ Միհրանը հոգով է երգում իմ հեղինակած երգը։ Ես կարծում եմ, որ ընդունվեց նաև երգի տեսահոլովակը, որին հաջողություն բերեց տաղանդավոր դերասանուհի Գրետա Մեջլումյանը։
Տարիներ առաջ դուք հեղինակեցիք «Ոսկե դպրոց» ֆիլմի սաունդթրեքը։ «Սրտիս հասցեն» երգը կատարեց երիտասարդ երգիչ Գոշը։ Այս երգի դիտումները 10 միլիոնից անցել են։ Եվ ահա «Սերը թակարդում» ֆիլմի կոմպոզիտորը Դուք եք։ Հե՞շտ է այս ասպարեզում աշխատելը։
-Ես սիրում եմ իմ աշխատանքը, իսկ երգն ինձ ուժ է տալիս։ Ֆիլմում «Տիեզերքի աղջիկ» երգից մի հատված ներկայացնում է տաղանդավոր դերասան Ավո Ադամյանը։ Կարծում եմ` երգի ամբողջական տարբերակը կսիրեն ֆիլմի երկրպագուները։
Շատերն են խոսում ձեր տաղանդի մասին։ Լինելով այսքան երիտասարդ` 25 տարեկան, հասցրել եք բարձրագույն կրթություն ստանալ, ծառայել բանակում և դառնալ 60-ից ավելի երգերի հեղինակ:
-Ես շատ ընկերներ ունեմ և շատերի հետ համագործակցում եմ երաժշտության ասպարեզում։ Աշխատում եմ միշտ օգնել դիմացինին։ Առաջիկայում հանդես կգամ նաև իմ հեղինակային երգերով։
Մեկնաբանություններ