JourNews.am-ը այսօր հյուրընկալվել էր Դիլիջանի ավագ դպրոցի տնօրեն՝ Արա Արամյանին.
Պարոն Արամյան ասացեք խնդրեմ,ո՞րն է Ձեզ համար ամբողջական կրթական համակարգը։
-Հանրակրթությունը միայնակ օղակ չէ, այն կապի մեջ է մանկապարտեզների, միջին
մասնագիտական, մասնագիտական, նախամասնագիտական կրթության և Բարձրագույն ուսումնական հաստատությունների հետ։
Մանկապարտեզից կամ նախակրթությունից մենք աշակերտներին ճանապարհում ենք միջին մասնագիտական և մասնագիտական կրթության։ Սա ամբողջությամբ կրթական համակարգ
է։ Միշտ նույն սխալն է թույլ տրվում, երբ առանձին ենք դիտարկում դպրոցը։
Ինչպիսի՞ն կուզենայիք տեսնել այսօրվա դպրոցը, աշակերտությանը և ընդհանրապես՝
մանկավարժին։
-Դպրոցը կարևոր օղակ է, որը պետք է կապի մեջ լինի հասարակության հետ։ Կրթությունը չի կարող ինքնանպատակ լինել, եթե ունենանք լավ մասնագետներ, կունենանք նաև լավ
տնտեսություն։
Ընդհանրապես, ավելի շատ մեր աշակերտները սովորում են հաշվապահություն, բժշկություն,
իրավաբանություն, մնացած մասնագիտություններին այդքան էլ ուշադրություն չեն
դարձնում։
Այս տարիների ընթացքում հանդիպել եմ և՛ վատ սովորող աշակերտների, և՛ լավ, որոնք ձգտում ունեն, աշխատասեր են և այժմ շարունակում են իրենց կրթությունը զարգացնել։
Ուսուցիչը և, առհասարակ, կրթական համակարգը կոչված են ոչ միայն կրթելուն, այլև
հասարակությանը պիտանի մարդ ու քաղաքացի դաստիարակելուն: Ի՞նչ եք կարծում,
ինչպիսի՞ սերունդ է 21-րդ դարում մեծանում։
-Մենք հիմա ունենք կրթական համակարգ, որը այդքան էլ բավարար չէ, սակայն 21-րդ դարում
մեծանում է շատ ազատ սերունդ, ինֆորմացիայով շատ հարուստ, ով տիրապետում է
տեղեկատվական տեխնոլոգիաներին և ավելի շատ ինֆորմացիա ունի, քան ուսուցիչն այսօրվա պայմաններում: Առաջներում այդպես չէր, հիմա երեխան ավելի շատ է զարգացած, քան մենք՝ հին սերնդի ուսուցիչներս:
90-ականներին այդ կրթական համակարգը ընդհանրապես չի բավարարել, մեր աչքի առաջ մի
ամբողջ համակարգ օրենքների բացակայության պատճառով քանդվում էր, կամ կային օրենքներ, որոնք այդ ժամանակաշրջանի համար չէին, սակայն գիտելիքների ծիլը խոր էր ու լայն, իմացության սահմանները ընդարձակ էին, կար կուռ կառույց, ամուր դպրոց, հիմնավոր գիտելիքների լուրջ ու ծանրակշիռ մեթոդիկա, հիմնավոր ու նպատակասլաց ձգտում։
Ինչպիսի՞ փոփոխություններ են սպասվում դպրոցում առաջիկայում։
-Այս պահին Տավուշի մարզում ընթանում են նոր չափորոշիչների փորձարկում, չեմ կարող ասել՝ ինչ արդյունք կտա, բայց լինելով այս կառույցի ղեկավար, բնականաբար, ամեն ինչ անելու եմ, որ այդ չափորոշիչների փորձարկումը ընթանա և յուրաքանչյուր փոփոխություն իր հետ բերի դրական արդյունք։ Այն կխթանի ուսուցիչներին նոր գիտելիքներ ձեռք բերելուն և այդ գիտելիքները երիտասարդներին փոխանցելու հնարավորությանը։ կրթությունը չի կարող նույն ձևով պահպանվել, և որքան հետաքրքիր է դառնում դասապռոցեսը, այնքան ավելի հեշտ են կարգավորվում խնդիրները։
Այս պահին մեր աշակերտների քանակը այդքան էլ մեծ չէ, հետևաբար մենք ջանք չենք խնայում, որպեսզի կրթենք և դաստիարակենք նրանց և կարողանանք հաջորդ սերունդներին
փոխանցել այն ամենը, ինչ մենք ունենք։
Եվ վերջում , չէ՞իք ցանկանա Ձեր պատգամը հղել դպրոցի նախկին շրջանավարտներին։
-Ես շրջանավարտներին առաջին հերթին ցանկանում եմ առողջություն, անսահման
հաջողություն, կամք և համբերություն կյանքի փորձություններից պատվով դուրս գալու համար։
Մեկնաբանություններ