«Գիրքը միայն ընկեր չէ, այն նաև ընկերներ է գտնում քեզ համար։ Երբ դու տիրում ես գրքին մտքով և հոգով, դու հարստանում ես։ Իսկ երբ դու փոխանցում ես այն, դու հարստանում ես երեք անգամ․․․»
Հենրի Միլլեր, «Գրքերը իմ կյանքում»
Եթե սիրում ես քո գրքերը, թո՛ղ, որ դրանք հեռանան քեզնից: Հենց այս նպատակով 20 տարի առաջ ստեղծվեց մի շարժում, որը միավորեց ամբողջ աշխարհի ընթերցասերներին ու նոր կյանք տվեց միլիոնավոր գրքերի, որոնք փոշոտվել էին աշխարհի չորս կողմերի մեծ ու փոքր գրապահոցներում․․․ Խոսքը, իհարկե, “BookCrossing”-ի մասին է:
Դեռ 2001 թվականին կյանքի կոչված այս գաղափարը այսօր համախմբում է ավելի քան 130 երկրի մոտ 2 միլիոն ընթերցողների, իսկ «վազող» գրքերի թիվը հասնում է 14 միլիոնի։
Այս համաշխարհային շարժմանը դու էլ կարող ես մասնակցել: Ամեն ինչ շատ պարզ է. վերցնում ես քո ամենասիրելի գիրքը, վրան փակցնում ես “BookCrossing”-ի նշանը և թողնում նստարանին, ինքնաթիռում կամ փողոցում՝ մի հարմար տեղ: Մեկ ուրիշը գտնում է այն, կարդում, թողնում մեկ այլ տեղ: Այսպես քո գիրքը կարողանում է շրջել աշխարհով մեկ:
«Սա նման է ընթերցողների խմբի, որը աշխարհագրական սահմաններ չունի, — իր հարցազրույցներից մեկում ասել է նախաձեռնության համահիմնադիր Ռոն Հորնբեյքերը:- Ձեր ընկերների և հարևանների հետ գրքեր փոխանակելը բնական երևույթ է: Այն, ինչ մենք արել ենք, տվյալների բազա ստեղծելն է, որպեսզի կարողանաք տեսնել, թե որտեղ են ձեր գրքերը»:
“BookCrossing”-ը պաշտոնական էջ ունի՝ bookcrossing.com, որտեղ էլ դու կարող ես տեսնել, թե քո գիրքը հիմա աշխարհի որ անկյունում է գտնվում: Միայն գիրք գտնելու դեպքում պետք է գրանցել տվյալները կայքի համապատասխան հարթակում, որպեսզի գրքի տերը կարողանա հետևել իր «ընկերոջ» ընթացքին:
Այնպես որ, եթե մի օր պատահաբար փողոցի նստարաններից մեկի վրա վազող գրքի պիտակով փաթեթ տեսնեք, չզարմանաք. այդ գիրքը պարզապես փնտրում է իր ընթերցողին:
Մեկնաբանություններ