Մոլորակը պաշտպանելու համար մենք չենք սպասում լուծումների, մենք ստեղծում ենք դրանք։
Nike
Սպորտային ապրանքներ արտադրող հսկայի՝ Nike-ի ռազմավարության կարևոր հենակետը արդեն երկար տարիներ շարունակում է մնալ կլիմայի փոփոխության դեմ պայքարը։ Ընկերությունը “Move to Zero” կարգախոսով փորձում է զրոյական ածխածնի ու զրոյական թափոնների ցուցանիշ գրանցել։ Ըստ սկզբնական նախագծի՝ 2025-ին Nike-ն արդեն պատրաստ կլինի սպառողին ներկայացնելու արտադրանք, որը ամբողջապես կվերահսկի կլիմայի փոփոխության վրա ազդող մի շարք գործոններ:
“Move to Zero”-ի հիմքերը
Դեռ 1990-ական թվականներից Nike-ն ունի մի շարք առանձին խմբեր, որոնք զբաղվում են կայուն արտադրանք ու զարգացում ունենալու ուղղությամբ։ Սակայն արդեն 2019 թվականից արտադրողի առաջ դրված խնդիրներն ու նպատակներն ավելի հստակ և համակարգված դարձան։ Հասկանալով, որ մոլորակին սպառնացող խնդիրները նաև կապված են սպորտի հետ՝ գաղափարի հեղինակները որոշեցին միավորել մարզաշխարհի ներկայացուցիչներին, հեղինակավոր ակումբներին ու մարզասերներին։ «Սպորտի ապագան փրկելը նշանակում է մոլորակը փրկելու մեր բաժինը կատարել»,- ասում են շարժման մասնակիցները։
Բնապահպանական տեսանկյունից արդյունավետ լինելու բաղադրիչը հիմնականում առկա է սպորտային կոշիկների արտադրության մեջ։ 2002 թվականին ընկերության ճարտարագետները մշակեցին ռետինե տակացուների բանաձև, որը պարունակում էր 96%-ով ավելի քիչ վնասակար նյութեր, քան սովորականը։
“Move to Zero”-ն շրջակա միջավայրին հասցվող վնասը նվազեցնելուց բացի նպատակ ունի ապրանքանիշի արտադրանքով դրական տեղաշարժ գրանցելու։ Nike-ն աշխարհին հորդորում է նվազեցնել թափոնների քանակը, վերօգտագործել ու վերամշակել, դառնալ կլիմայի փոփոխման ու դրա աղետաբեր հետևանքների դեմ պայքարի մասնակիցը։
Մարզաշխարհն արձագանքում է
Ֆուտբոլում, թենիսում ու հատկապես ձմեռային մարզաձևերում գլոբալ տաքացման հետևանքները կանխելու համար շարժմանը ամեն օր ավելի շատ մարզիկեր ու սպորտային ակումբներ են միանում։ Ֆուտբոլային աշխարհում Բարսելոնայի, Չելսիի, Լիվերպուլի, Մադրիդի Ատլետիկոյի, Տոտենհեմի ու Ինտերի այս մրցաշրջանի համազգեստները 100% վերամշակված գործվածքից են պատրաստված։ Յուրաքանչյուր համազգեստի համար Nike-ն օգտագործում է մոտ 12 պլաստիկ շիշ։ Ընկերությունը հայտարարել է նաև, որ երկրպագուների համար նախատեսված մարզաշապիկները նույնպես էկոլոգիապես մաքուր ու վերամշակված հումքից են լինելու։
Թիրախային գոտում են հատկապես ձմռանն անցկացվող մրցաշարերը։ Ըստ Nike-ի հետազոտության՝ վերջին տարիների համեմատ մեկ տարվա ընթացքում 7%-ով նվազում են սնոուբորդինգով զբաղվելու համար հարմար օրերը։ Պատճառը, իհարկե, գլոբալ տաքացումն է։
Nike-ն իրապես կարելի է համարել սպորտում գլխավոր բնապահպանը, որը իր արտադրության տարբեր ոլորտներում մշակում է մոլորակը պահպանելու նոր մոտեցումներ։ Էկոլոգիապես մաքուր սպորտային ապրանքների հասանելիությունից բացի՝ ընկերությունը նաև բնապահպանական ծրագրեր է հովանավորում, մասնակցում է Երկիր մոլորակի անտառային ֆոնդի վերականգնմանը, իրականացնում կարևոր քարոզչություն։
“Just do it”,- ասում է Nike-ն ու աշխարհի տարբեր կետերից մարդկանց համախմբում շրջակա միջավայրի մասին հոգ տանելու գաղափարի շուրջ․․․
Մեկնաբանություններ