Երիտասարդական համախմբում

«Երիտասարդական համախմբում» նախաձեռնության շրջանակներում հերթական հավաքի մեկնարկը տրված է։Ճամբարային 3-րդ հավաքի մասնակիցները Եղեգիս խոշորացված համայնքի 18-30 տարեկան երիտասարդներն էին։ Եղեգիս համայնքի Հերմոն բնակավայրի Սիրանույշ ճամբարում իրականացված եռօրյա ծրագրի նպատակն էր երիտասարդների շրջանում մշակութային, մարմնամարզական, արտակարգ իրավիճակների, ռազմարվեստի, պատմամշակութային կոթողների վերաբերյալ տեսական և գործնական գիտելիքների ու կարողությունների զարգացումը։Երիտասարդների հետ հանդիպում ունեցան ԱԻՆ Եղեգնաձոր փրկարարական վարչության ներկայացուցիչները․ իրականացվեց «Գետանցում» պրակտիկ դաս՝ կամավորների մասնակցությամբ։ Ունեցան զրույց-հանդիպում հայ-ամերիկյան շարունակական կրթության ՎՁ պատասխանատուի հետ, հյուրընկալեցին Վայոց ձորի թեմի առաջնորդ Գերաշնորհ Տ․ Աբրահամ սրբազանին, քննարկում ունեցան Ամերիկյան համալսարանի կրոնագիտության դասախոս Հարություն Հարությունյանի հետ։ Մշակույթի մասն ամփոփվեց Եղեգիս բնակավայրի Զորաց եկեղեցում։ Օրվա վերջում, խարույկի շուրջ հավաքված, ճամբարականները կիսվեցին երեք օրերի ընթացքում իրենց ստացած տպավորություններով ու գիտելիքներով։Մենք զրուցեցինք ծրագրի համակարգող Համիկ Գալստյանի, Եղեգիս համայնքի տնտեսական զարգացման պատասխանատու Շուշան Դանիելյանի, Ամերիկայն համալսարնաի կրոնագիտության դասախոս Հարություն Հարութունյանի հետ, ինչպես նաև իմացանք մասնակիցների կարծիքը ճամբարի մասին։

Հարցազրույցների նյութերը հաջորդիվ՝

-Կխնդրեի պատմել ծրագրի իրականացվող գործառույթների և նպատակի մասին։

Վայոց ձորի թեմը և Սյունիք-Զարգացում ՀԿ-ն Վայոց ձորի մարզպետարանի հետ համագործակցելով, թեմապատկան Սիրանույշ ճամբարում իրականացնում են «Երիտասարդական համախմբում» հավաքների երկարամյա ծրագիր: Նախատեսվում է յուրաքանչյուր շաբաթվա՝ ուրբաթ, շաբաթ և կիրակի օրերին ճամբարում հյուընկալել Վայոց ձորի մարզի մեկ խոշորացված համայնքի 18-30 տարեկան երիտասարդների: Այս կերպ Վայոց ձորի խոշորացված 8 համայնքներից յուրաքանչյուրը երկու ամիսը մեկ հնարավորություն կունենա մասնակցել եռօրյա հավաքին:Հավաքների նպատակը իմացական, մշակութային, մարմնամարզական, արտակարգ իրավիճակների, ռազմարվեստի վերաբերյալ տեսական և գործնական գիտելիքների և կարողությունների զարգացումն է: Յուրաքանչյուր համայնքում նշանակվել է 4-6 հոգանոց կոորդինացնող խումբ՝ համայնքի ակտիվ երիտասարդներից, համայնքապետերի գլխավորությամբ: Կազմակերպվում են նաև հանդիպումներ մարզպետի, թեմի առաջնորդի, մշակութային գործիչների, սփյուռքից համագործակից անհատների հետ:

-Ինչո՞վ էր պայմանավորված Եղեգիս համայնքում ծրագիրն իրականացնելը։ Ի՞նչ կտա ծրագիրը երիտասարդներին։

Ծրագիրը Եղեգիս համայնքում է իրականցվում, քանի որ համայնքի Հերմոն բնակավայրում է գտնվում Վայոց ձորի թեմապատկան Սիրանույշ ճամբարը և տարիներ շարունակ այստեղ տարբեր երիտասարդական ծրագրեր, հավաքներ և ճամբարներ են իրականացվել, հետևաբար այս անգամ ևս այստեղ իրականացվեց երիտասարդական հավաքը։

-Ի՞նչ կտա ծրագիրը երիտասարդներին։ Շարունակակա՞ն են լինելու այսպիսի հավաքները։

Երիտասարդական հավաքները բացառիկ հնարավորություն են երիտասարդներին մեկտեղելու և մեկ հարթակում միասնական խումբ ստեղծելու համար։ Ծրագիրը երիտասարդներին հնարավորություն է տալիս ոչ միայն գալ ու տեղում ստանալ արտակարգ իրավիճակների, ռազմական արվեստի, առաջին բուժօգնության վերաբերյալ տեսական և գործնական գիտելիքներ, այլ նաև իրենք կարող են ստեղծել նոր մեթոդներ, ձևավորել հրաշալի ընկերական միջավայր։ Բայց իհարկե շեշտը դրվում է այն կրթական կոմպոնենտի վրա, որը ճամբարականները ստանում են ծրագրի շրջանակներում։
Այո՛, ծրագիրը շարունակական է լինելու և բոլոր 8 համայնքների երիտասարդները հնարավորություն են ունենալու ևս մեկ անգամ մասնակցելու նույն կամ որոշակի փոփոխված կազմով, կախված, թե երիտասարդներն ինչ ակտիվություն կցուցաբերեն։

—Եվ որպես ամփոփում. Ձեր խոսքը Եղեգիս համայնքի երիտասարդներին և ոչ միայն։

Ես հորդորում եմ մեր երիտասարդներին, որ բաց չթողնեն որևէ միջազգային կամ տեղական ծրագիր և փորձեն լինել իրենց համայնքի զարգացման մի մասնիկը, փորձեն դառնալ այն փոքրիկ քայլն անողներից մեկը, որ համայնքը կտանի զարգացման։ Վստահ եմ, որ յուրաքանչյուրիցս է կախված, թե մեր համայնքը ինչպիսին կլինի․ մենք ենք և մեր ներուժը, որ կարող է մեր երկիրն ու տնտեսությունը ոտքի հանել։ Ուրախ կլինենք, որ այն երիտասարդները, ովքեր երբևէ չեն մասնակցել մեր ծրագրերին,պասիվություն են ցուցաբերել, թող այս երիտասարդական համախմբումը լինի ազդակ իրենց համար։ Երիտասարդները համախմբվելով , խելք խելքի տալով կարող են միասին մեծ հաջողությունների հասնել, ինչպես ասում են․ մի խելքը լավ է, մի քանիսը՝ շատ ավելի։ Հենց դրա համար էլ «համախմբում» խորագիրն ենք ընտրել ծրագրի համար, պետք է գան և միասին հասկանան, թե որն է լինելու իրենց առաքելությունը և ինչ կարող են անել, որպեսզի մեր երկիրը լինի ավելի կայուն ու զարգացած։

ՇՆՈՐՀԱԿԱԼ ԵՄ

-Շուշան ջան, շնորհակալ եմ հարցազրույցի հրավերն ընդունելու համար։ Ծրագիրն իրականացնեղներից մեկն էլ դու ես, ինչպես եղավ, որ նախաձեռնեցիր նման ծրագրի իրականացումը։

-Ես նույնպես շնորհակալ եմ հարցազրույցի և մեր ծրագիրը լուսաբանելու համար։ Ծրագիրն իրականացնում է «Սյունիք-Զարգացում» ՀԿ-ն, համագործակցելով Վայոց ձորի մարզպետարանի և Եղեգիսի համայնքապետարանի հետ։ Եղեգիս համայնքի երիտասարդների հետ բազմիցս ծրագրային փորձ ունեցել եմ, վստահեցին այս ծրագիրն ինձ, որ կարող եմ համակարգել և երիտասարդներին հավաքել այստեղ։ Իհարկե սպասելիքները շատ մեծ էին՝ կիսով չափ արդարացան, կիսով չափ՝ ոչ, բայց հույս ունենանք՝ հաջորդներն է՛լ ավելի լավ կլինեն։

-Ի՞նչպես ես գնահատում երիտասարդների ներգրավվածությունը ծրագրին։

—Եղեգիս խոշորացված համայքնի մասնակիցները բավական քիչ էին համայնքի բնակավայրերի թվի համեմատ․ ունենք 12 բնակավայր, բայց գրանցվել էր 68 մասնակից, որոնցից 48-ը ներկա գտնվեց։ Ավելի մեծ սպասելիքներ ունեի, բայց ինչպես ասում են՝ քանակը կարևոր չէ, կարևորը որակն է։

-Ի՞նչն էր պատճառը։

-Պատճառը հիմնականում քովիդն էր. մենք ունենք բնակավայրեր, որոնց երիտասարդները շատ ակտիվ են ․ Քարագլուխ, Արտաբույնք , Շատին, բայց շատերը քովիդով էին վարակված և կային մասնակիցներ, որոնք այս պահին քննություններ, ստուգարքներ ունեին, այդ պատճառով չկարողացան մասնակցել։

-Ի՞նչ դժվարությունների ես հանդիպել ծրագիրն իրականացնելիս։

—Կազմակերպման ընթացքում բացառապես խնդիրներ չեն առաջացել, քանի որ «Սյունիք-Զարգացում» ՀԿ-ն ամեն ինչ շատ լավ կազմակերպել էր, ես էլ ինչով կարողացել օգնել եմ, շատ լավ ծրագիր է մշակված, հույս ունենանք շարունակական բանույթ կկրի։

-Ի՞նչ տպավորություն ես ստացել այս օրերի ընթացքում, եւ արդարացվել են արդյոք քո սպասելիքները։

-Տպավորություններս աննկարագրելի են․ մասնակիցները շատ լավն են ու ակտիվ, միայն ափսոսում եմ, որ այսպիսի ծրագրերը համայնքում քիչ են ու մասնակիցները պասիվանում են դրանից, չեն մոտիվացվում։ Հուսամ՝ մասնակիցներն էլ այնքան տպավորված կլինեն, որ հաջորդին ինքնակամ ինձ կզանգեն ու կասեն ՝ երբ է հաջորդը լինելու։

ՇՆՈՐՀԱԿԱԼ ԵՄ

-Պարո՛ն Հարություն, խնդրում եմ ներկայացնել իրականցվող ծրագրում Ձեր ներգրավվածության նպատակը։

-Ծրագրում իմ նպատակն այն է, որ մենք 44-օրյա պատերազմից հետո, փորձենք քայլեր անել ազգովի կազդուրվելու և ելքեր գտնելու ստեղծված իրավիճակից դուրս գալու համար, և բացի դա՝ այն շրջաններում, որտեղ չկան մասնագիտական օժանդակություն ու չկան ռեսուրսներ, որ օգնեն հետպատերազմական սթրեսը հաղթահարելուն՝ մտածեցի, որ պետք է այսպիսի մի բան նախաձեռնել ու շատ լավ է , որ թ՛ե Աբրահամ սրբազանը, թ՛ե Սյունիք ՀԿ-ն համաձայնեցին ինձ հետ։ Ես նայել եմ կոնցեպտի վերջնական տեսքը, մի քանի բան ավելացրել եմ հոգևոր կամ հոգեբանական առումով ու հիմա եկա անձամբ հանդիպելու և զրուցելու։

-Դասընթացի շրջանակներում իրականացված քննարկումը որևէ արդյունք տվե՞ց, ինչպիսի՞ տպավորություններ ստացաք և ի՞նչ կարծիք կազմեցիք։

-Քննարկման այս ֆորմատը կոչվում է «Ֆիշ բոուլինգ»՝ նշանակում է տաշտի միջից լավ ձուկ հանել։ Այս եղանակով ոչ միայն դասախոսն է աշխատում, այլ նաև մասնակիցներն էլ, եթե լավ մտքեր ունեն, արտահայտում են։ Ես շատ տպավորված էի, որ մասնակիցները կամավոր դուրս եկան ու ասեցին․ << Ես ել եմ ուզում խոսել, ես էլ եմ ուզում խոսել>>։ Շատ կարևոր դիտարկումներ արեցին թ՛ե խնդիրների ախտորոշման և թ՛ե դրական լուծումները մատնանշելու հարցում։

-Բավարարեցի՞ն Ձեզ մասնակիցների դիտարկումները և առաջարկած լուծումները։ Ձեր ամփոփիչ խոսքը։

-Ա՛յո, ես կարող եմ ասել՝ բավարարված եմ ։ Ուրախ եմ մեր երիտասարդների համար, որ իրենց մեջ ուժ են գտնում խնդիրների մասին խոսելու, նման հավաքներին մասնակցելու։ Կարծում եմ՝ քաջություն է պահանջում։ Ես, որ հիշում եմ ինձ այդ տարիքում՝ այդքան համարձակություն չունեի, մանավանդ, եթե սրբազանը կամ այլ պաշտոնատար անձ գար, գուցե ընդհանրապես չխոսեի, բայց մեր երիտասարդությունը ունի այդ համարձակությունը և տիրապետում է ինֆորմացիային։ Տպավորված եմ․ մեծ սպասելիքներ ունեմ․ ինչպես քննարկման վերջում ասեցի՝ նարանք անելու են այն , ինչը ո՛չ մեր ծնողներն են կարողացել արել, ո՛չ էլ մենք ենք հիմա կարողանում անել, դա անելու է այս նոր սերունդը, որ մի 10-15 տարի հետո հասարկական մեծ գործունեություն է ծավալելու։

Շնորհակալ եմ հարցազրույցի համար

-Բախտ վիճակվեց երեք անմոռանալի օր անցկացնել Սիրանույշ ճամբարում։ Տպավորություններս շատ լավն են․ նոր ընկերներ, նոր գիտելիքներ, նոր ծանոթություններ, նոր ուղի ստեցծելու հնարավորություն, —ՄԵՐԻ

-Ճամբարային երեք օրերը անմոռանալի էին ամեն ինչով․ հաճելի միջավայր, հաճելի մարդիկ։ Շնորհակալ եմ «Սյունիք-Զարգացում» ՀԿ-ին, մեզ նման հնարավորություն ընձեռելու համար, —ՎԱՆԻԿ

-Լավագույն պահերն էին՝ մեկը բոլորի՝ բոլորը մեկի համար։ Շա՜տ հագեցած և հետաքրքիր օրեր էին։ Շնորհակալ եմ կազմակերպիչներին մեզ ներգրավելու նման ծրագրում,- ՀԱՍՄԻԿ

-Ճամբարում մենք ունեցանք երեք անմոռանալի ու երանելի օրեր, ստացած տպավորություններս չեմ կարող բառերով նկարագրել․ հրաշալի թիմ, լավ մարդիկ, նոր գիտելիքներ ու ընկերներ,- ԱՐՏԱՇ

Հավաքներն ունենալու են շարունակական բնույթ։